សម្រង់សម្តីទាំង ៥ លើកទឹកចិត្តអ្នកឲ្យរឹងមាំហ៊ានប្រឈមមុខយកឈ្នះលើភាពភ័យខ្លាច

ស្រមោលភាពភ័យខ្លាច ឬ ឧបសគ្គនានាប្រហែលជាបានក្លាយជាស្រមោល តាមប្រាណយាយីមិនចេះចប់មិនចេះហើយរបស់បុគ្គលមួយចំនួន។ នេះបណ្ដាលមកពីបុគ្គលនោះមិនបានសិក្សាស្វែងយល់ឲ្យស៊ីជម្រៅពីភាពភ័យខ្លាច ឬ ឧបសគ្គទាំងនោះហើយចេះតែបោះបង់ មិនហ៊ានងើបមុខដេករង់ចាំតែកើតទុក និង បរាជ័យគ្មានស្រាកស្រាន្ត។

ឈប់គិតពីបញ្ហានេះតទៅទៀត ហើយចាប់ផ្ដើមជីវិតរបស់លោកអ្នកសាជាថ្មី និង យកសម្រង់ពាក្យសម្ដីដ៏មានតម្លៃរបស់បុគ្គលល្បីៗ ចំនួន៥ ខាងក្រោមនេះទៅពិចារណាដើម្បីទុកជាពន្លឺធ្វើជាក្តីសង្ឃឹមសម្រាប់លោកអ្នក។

១) Marie Curie គីមីវិទូជនជាតិប៉ូឡូញ

«មានអ្វីដែលគួរឲ្យខ្លាចនោះឡើយនៅក្នុងឆាកជីវិតរបស់មនុស្ស។ ជីវិតគឺជាអ្វីដែលយើងត្រូវសិក្សាស្វែងយល់»។

នៅក្នុងស្ថានភាពជាក់ស្ដែង មនុស្សភាគច្រើនមានការភ័យខ្លាចមិនហ៊ានប្រឈមមុខបញ្ហានានានៅក្នុងជីវិតដែលនេះធ្វើឲ្យពួកគេបរាជ័យ។ យ៉ាងណាមិញ ប្រសិនបើអ្នកចូលឲ្យកៀកកើយទៅនឹងភាពភ័យខ្លាច អ្នកនឹងអាចស្គាល់ចំណុចខ្សោយបញ្ហានោះកាន់តែច្បាស់ ហើយនេះជាអ្វីដែលអ្នកមិនបានដឹងនៅពេលកន្លងមក។ ការពិត បញ្ហា ហានិភ័យ និង ភាព ភ័យខ្លាចទាំងនោះនឹងសាបរលាបទៅវិញ ដរាបណាអ្នកកាន់តែស្គាល់វាកាន់តែច្បាស់ ហើយវាបង្កប់ទៅដោយមេរៀនជីវិតយ៉ាងមានតម្លៃជាច្រើនទៀតផង។

២) Lucas Jonkman វាគ្មិនអាមេរិក

« ត្រូវក្រោកឈរប្រឆាំងទៅនឹងភាពភ័យខ្លាចទាំងឡាយ ហើយអ្នកនឹងក្លាយជាអ្នកឈ្នះនៅក្នុងសមរភូមិប្រយុទ្ធ។ ត្រូវក្រោកឈរឡើងប្រឈមទៅនឹងភាពភ័យខ្លាចរបស់អ្នក ហើយអ្នកនឹងមានសេរីភាពជារៀងរហូត»។

មិនខុសពីអ្វីដែលបានបកស្រាយនៅខាងដើម ភាពភ័យខ្លាច ឬ ឧបសគ្គរបស់អ្នកមិនអាចស្ថិតនៅក្នុងស្ថានភាពមួយដូចអ្វីដែលអ្នកបានគិតនោះឡើយ នៅពេលដែលអ្នកព្យាយាមខិតកាន់តែជិតវា។ ការពិត អ្នកអាចយកឈ្នះភាពភ័យខ្លាចដោយសារការហ៊ានប្រឈមមុខនេះឯង ពោលបើវាធ្វើឲ្យអ្នកបរាជ័យកាន់តែច្រើនដឹង តែអ្នកនៅតែព្យាយាមតតាំងដោយមិនបោះបង់ នោះអ្នកនឹងទទួលបានជ័យជំនះជាមិនខាន។

៣) Marilyn Monroe អតីតតារាសម្ដែងជើងចាស់របស់អាមេរិក

« មនុស្សគ្រប់គ្នាគួរតែចាប់ផ្ដើមរស់នៅឲ្យមានន័យបំផុតមុនពេលមុនពេលអាយុកាន់តែចាស់។ អ្នកដែលមិនហ៊ានប្រឈមមុខនឹងភាពភ័យខ្លាច គឺជាមនុស្សល្ងង់ខ្លៅ»។

តារាសម្ដែងរូបនេះបាននិយាយថា មនុស្សគ្រប់រូបគួរណាស់តែត្រូវធ្វើឲ្យជីវិតរបស់ខ្លួនមានតម្លៃ និង រស់នៅដោយមានន័យបំផុត។ Monroe បានបន្តថា បើអ្នកអនុញ្ញាតឲ្យភាពភ័យខ្លាច ឬ ការបរាជ័យមកបំផ្លាញជីវិតរបស់អ្នក វានឹងមកបំផ្លាញជីវិតអ្នកជារៀងរហូត ហើយអ្នកដែលចុះចាញ់នឹងភាពភ័យខ្លាចគឺជាអ្នកដែលល្ងង់ខ្លៅបំផុតផងដែរ។ អ្វីដែលនាងចង់ដាស់តឿននៅពេលនេះ គឺអ្នកត្រូវបណ្ដេញភាពភ័យខ្លាចឲ្យចាកចេញពីអ្នកឲ្យបានជាដាច់ខាត។

៤) Dale Carnegie អ្នកនិពន្ធអាមេរិក

« អ្នកត្រូវធ្វើជាមួយអ្វីដែលអ្នកខ្លាច ហើយបន្តធ្វើជារៀងរហូត។ នេះជាវិធីសាស្ត្រដ៏រហ័ស និង ស័ក្ដិសិទ្ធិបំផុតដើម្បីកាច់បំបាក់ភាពភ័យខ្លាច»។

មិនខុសពីសម្ដីរបស់បុគ្គលល្បីៗខាងលើ អ្នកនិពន្ធអាមេរិករូបនេះបានបញ្ជាក់យ៉ាងច្បាស់ថាវិធីសាស្ត្រដ៏រហ័ស និង ស័ក្ដិសិទ្ធិបំផុតដើម្បីកាច់បំបាក់ភាពភ័យខ្លាច គឺត្រូវហ៊ានប្រឈមមុខនឹងភាពភ័យខ្លាចនេះតែម្ដង។ មានតែអ្នកប៉ុណ្ណោះដែលដឹងថា ភាពភ័យខ្លាច ឬ ឧបសគ្គរបស់អ្នកមានតម្លៃបែបណាខ្លះ ហើយនោះគឺជាអ្វី ដែលអ្នកត្រូវសិក្សារៀន សូត្រ និង ស្វែងរកដំណោះស្រាយដើម្បីភាពជោគជ័យរបស់អ្នក។

៥) Benjamin Franklin បិតាស្ថាបនិករបស់អាមេរិក

« សូមកុំភ័យខ្លាចទៅនឹងកំហុសដែលកើតមានឡើង។ នៅពេលដែលអ្នកហ៊ានប្រឈមមុខនឹងវា អ្នកនឹងដឹងថា កំហុសនោះមានសារសំខាន់អ្វីខ្លះ»។

ងាកមកមើលបណ្ដាំចុងក្រោយពីការប្រឈមមុខនឹងភាពភ័យខ្លាចរបស់បិតាស្ថាបនិកអាមេរិកឯណេះវិញបានដាស់តឿនថា អ្នកនឹងឈ្នះទោះបីជាឧបសគ្គនោះអាក្រក់បែបណាក៏ដោយ ឲ្យតែអ្នកមិនព្រមបោះបង់។ តាមអ្វីដែលលោកបកស្រាយ កំហុសគឺជារឿងធម្មតារបស់មនុស្សទៅហើយ ហើយបើអ្នកព្យាយាមសិក្សារៀនសូត្រពីកំហុស ក៏ដូចជាការបរាជ័យរបស់អ្នក អ្នកនឹងក្លាយជាអ្នកឈ្នះ ហើយទីបំផុតទើបអ្នកដឹងថា ការបរាជ័យ ឧបសគ្គ ភាពភ័យខ្លាច គឺជារឿងមួយធម្មតា៕